2025 сыл Иэйиэхсит сыла үүнэр

Үүнэр 2025 – Иэйэхсит сыла. Мөһүлгэҕэ (уон икки сыллаах эргииргэ) бүтэһигинэн бэлиэтэнэр. Иккис халлааҥҥа олорор. Кини тыынар тыыннааҕы барытын араҥаччылыыр уонна быйаҥы үөскэтэр аналлаах.
Иэйиэхситтэр элбэхтэр: Киһи иэйиэхситэ – Нэлбэй, Нэлэгэлдьин, Эдьээн Иэйиэхсит. Сылгы иэйиэхситэ – Сэлэгэлдьин, Дьөһөгөй Иэйиэхсит.
Ынах-сүөһү иэйиэхситэ – Мылахсын, Ынахсыт, Иһэгэй Иэйиэхсит уо.д.а
Саха итэҕэлигэр Айыыһыт уонна Иэйиэхсит айыылар аҕас-балыстыылар, Үрүҥ Айыы Тойон кыргыттара буолаллар. Ол алгыс тылыгар маннык этиллэр: «Айыыһыккыт аргыстаннын, Иэйиэхсиккит эҥээрдэстин»,-диэн.
2025 сыл Иэйиэхсит хотун сыла үүнэр. Кини сылаас тыына буорга, ууга, салгыҥҥа иҥэр. Киһини амарах, эйэҕэс оҥорор, бары куһаҕантан арчылыыр. Иэйиэхсит кири-хоҕу сөбүлээбэт.
Иэйэхсит аһаҕас майгылаах, эйэҕэс, амарах, өл. Иэйиэхсит кэллэҕинэ, от – мас көҕөрөр, ас-үөл дэлэйэр. Иэйиэхсит киһини бары куһаҕантан сэрэтэр, араҥаччылыыр.
Иэйиэхсит киһиэхэ сүөһү көрөөччү, булчут, үүннэрээччи, эмчит идэлэри биэрэр.
Киһи барахсан Айыылыы санаата уһуктар кэмэ кэллэ. Өркөн өй – муударай мутуга тобуллар кэмэ. Киһи айылҕаттан дьоҕурдара арылларыгар бэрт кэм. Талба талааннаргытын арына сатаатаххытына – сатабыллаах дьон буолан – дьоҥҥө — сэргэҕэ кэрэхситэр кэмҥит кэллэ. Өтө көрөр, сэрэйэр айылгылаах, онон ааһан иһэр албыҥҥа – түөкэйгэ үктэппэт. Кыһалҕалаахха ис сүрэҕиттэн көмөлөһө сатыыр киһи – элбэх ситиһиигэ тиксиэ.
Иннигитин туохха да биэрбэт буоллаххытына, кыыһыра- тымта, улаатымсыйа сатаатаххытына- Дьолуо Айыыһыт тиэрэ эргийиэ. Ыарахан ньэгири түргэнник аһарына үөрэниҥ. Өһүргэниини, бэйэни аһыныыны тохтотуҥ. Дьиэ кэргэҥҥэ ытыктабыл, өйдөһүү – өйөһүү, бэйэ – бэйэни харыстааһын сыаннастарын өрө тутуу.
Сорох сэлээр быһыылар-майгылар – үтүөнү түстээбэт сыллара. Өйү тутуу, киэҥ көҕүстээх буолуу, дуоспуруннаах туттуулаах дьону быйыл — хаччы оҥоруу, байыы-тайыы күүтэр сыла.